about us2

བཀའ་ཟུར་ཨ་མ་རྗེ་བཙུན་པདྨ་ལགས་ཀྱིས་མི་ནི་སོ་ཊའི་སློབ་ཕྲུག་རྣམས་ལ་གནང་བའི་བཀའ་སློབ་སྙིང་བསྡུས། མི་ནི་སོ་ཌའི་བོད་རིགས་རྒྱུན་ལས་རྣམ་པ་དང་ཕ་མ་རྣམ་པ། དགེ་རྒན་རྣམ་པ། སློབ་ཕྲུག་རྣམ་པ་ཚང་མ་ལ་བཀྲ་ཤིས་བདེ་ལེགས་ཞུ་ཡ་ཡིན། ད་ཐེངས་ཨ་རིའི་ནང་ཕྱོགས་བསྐྱོད་ཀྱི་སྐབས་དང་བསྟུན་ནས་འདིར་མི་ནི་སོ་ཊ་ལ་ཕེབས་ཐུབ་པར་གུས་མོ་ང་ཞེ་དྲག་དགའ་པོ་བྱུང་། སྤྱིར་བཏང་ཡིན་པ་ཡིན་ན། ཤེས་ཡོན་དང་སློབ་གསོ་ཟེར་བ་དེར་བཤད་ནས་ཚར་འགྲོ་རྒྱུ་དང་སྒྲུབ་ནས་འགྲུབ་འགྲོ་བ་ཞིག་ཕལ་ཆེར་ཡོད་པ་མ་རེད། དེ་མི་རབས་ནས་མི་རབས་བརྒྱུད་ནས་མུ་མཐུད་དུ་བསྒྲུབ་ཅིང་ཡར་རྒྱས་སུ་གཏོང་དགོས་པ་ཞིག་རེད། དེ་བཞིན་དུ་ང་ཚོ་ཚང་མ་ལ་མེད་དུ་མི་རུང་བའི་བཟང་སྤྱོད་དང་གཞན་ཕན་ཡང་དེ་འདྲ་བོ་རེད། ༡ ཁྱེད་སློབ་ཕྲུག་རྣམ་པས་དེ་རིང་ཞོགས་པར་ཞོགས་འདོན་སྐྱོར་བ་དཔེ་ཡག་པོ་བྱུང་སོང་། ཁྱད་པར་དུ་ཁྱེད་རང་ཚོས་གང་བློ་མ་བཏོན་གནང་སོང་། དེ་དཔེ་ཡག་པོ་རེད། ད་ཡིན་ནའང་། ཁྱེད་རང་ཚོས་ཁ་ནས་སྐྱོར་ཐུབ་ཡ་གཅིག་པོས་ཆོག་ཡོད་པ་མ་རེད། ཁྱེད་རང་ཚོས་ད་ལྟ་རང་སྐྱོར་བའི་ཤེས་རབ་གང་བློ་མ་སོགས་ནང་པ་སངས་རྒྱས་པའི་ཆོས་ཀྱི་ནང་དོན་ཕྲན་བུ་ཤེས་ཡ་དེ་དཔེ་མི་སྲིད་པའི་གལ་ཆེན་པོ་རེད། དེ་ག་རེ་རེད་ཅེ་ན། ཁྱེད་རང་ཚོས་ཁ་ནས་སྐྱོར་བ་ཙམ་མིན་པར་ཆོས་དང་རིག་གཞུང་གི་ནང་དོན་ཅུང་ཤེས་སོང་བ་ཡིན་ན་སོ་སོའི་ཀླད་པའི་ནང་མི་བརྗེད་པ་བྱས་ནས་རྒྱུན་རིང་པོར་སྡོད་ཐུབ་ཀྱི་ཡོད་པ་རེད། ཁྱེད་རང་ཚོས་ག་དུས་བེད་སྤྱོད་བྱེད་བསམ་ན་དེ་དུས་རང་བཞིན་ངང་གིས་ཤེས་བསྡད་ཡོད་པ་རེད། དེ་འདྲ་སོང་ཙང་། ཁྱེད་རང་ཚོས་བོད་ཀྱི་ཆོས་དང་རིག་གཞུང་གི་ཆ་ཤས་གང་ཞིག་སྦྱང་བ་ཡིན་ན་དེའི་ནང་ག་རེ་ག་རེ་གསུང་ཡོད་པ་ཤེས་རྒྱུ་དཔེ་གལ་ཆེན་པོ་རེད། དེ་མ་བརྗེད་པ་གནང་རོགས་ཞུ་ཡ་ཡིན། ༢ དེ་ནས་ད་དགེ་རྒན་རྣམ་པ་ལའང་ཞོགས་འདོན་དང་ཤེས་རབ་རྐང་ལོ་མ་གཙོས་པའི་སོ་སོའི་སློབ་ཁྲིད་སྐབས་ཀྱི་འཁྲིད་བྱ་ཐམས་ཅད་སློབ་ཕྲུག་ཚོའི་སེམས་ལ་ལས་སླ་བོར་ངེས་ཐུབ་པའི་འགྲེལ་བཤད་རྒྱག་པའི་འགན་འཁུར་ཆེན་པོ་ཡོད་པ་རེད།

༄༄། ཕྱི་ལོ་ ༢༠༡༨ ཟླ་ ༡༡ ཚེས་ ༡༡ ཉིན། བྱང་ཨ་རིག་ས་གནས་མི་ནིའི་སོ་ཊའི་བོད་རིགས་སྤྱི་མཐུན་ཚོགས་པའི་ཆོས་ཕྱོགས་སྡེ་ཚན་གྱིས་གོ་སྒྲིག་འོག་བོད་ཀྱི་ཆོས་བརྒྱུད་ཆེན་པོ་བཞི་དང་། གཡུང་དྲུང་བོན་བཅས་ཀྱི་ཆོས་ཚོགས་ཁག་གི་བླ་སྤྲུལ་དགེ་བཤེས་རྣམས་པ། དེ་བཞིན་བོད་རིགས་སྤྱི་མཐུན་ཚོགས་པའི་ཚོགས་གཙོ་ཟུར་པ་ཁག་ཅིག་དང་ལས་ཐོག་ཚོགས་གཙོ་དབུས་པའི་རྒྱུན་ལས་རྣམས་ལྷན་འཛོམས་ཐོག་ཚོགས་འདུ་ཞིག་འགོ་འཛུགས་ཞུས་ཡོད་ཅིང་། ཚོགས་འདུའི་དམིགས་ཡུལ་གཙོ་བོ་ནི་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་གི་དབུས་པའི་ཆོས་བརྒྱུད་ཁག་གི་བླ་ཆེན་རྣམས་པས་བཀའ་སློབ་ལམ་སྟོན་གཞིར་བཟུང་ཆོས་བརྒྱུད་ཕན་ཚུན་མཐུན་འབྲེལ་དང་མ་འོངས་བོད་ཕྲུག་རྣམས་ལ་བོད་ཀྱི་ཆོས་དང་རིག་གཞུང་སྐད་ཡིག་སོགས་ཀྱི་ཐད་ལ་ཡར་རྒྱས་གོང་འཕེལ་གཏོང་ཕྱོགས་དང་། མ་འོངས་པ་ལས་གཞི་སྤེལ་ཕྱོགས་སྐོར་གྱི་ཐོག་ལ་བགྲོ་གླེང་དང་བསམ་ཚུལ་བརྗེ་ལེན། གཞན་ཡང་ནུབ་ཕྱོགས་རྒྱལ་ཁབ་ཁག་ཏུ་འཚར་ལོངས་བྱེད་བཞིན་པའི་བོད་པའི་ན་གཞོན་ཚོའི་ཆོས་དང་རིག་གཞུང་སྐད་ཡིག་སོགས་གང་ཐུབ་ཀྱི་ཡར་རྒྱས་གོང་འཕེལ་གཏོང་ཕྱོགས་སྐོར་གྱི་ཐེངས་དང་པོའི་ཚོགས་འདུ་སྐབས་ཀྱི་པར་རིས་གཅིག་སྤྱན་འབུལ་ཞུས་ཡོད་པས་དགྱེས་གཟིགས་ཡོང་བ་འཚལ།